काठमाडौँ, १० साउन । स्वास्थ्य तथा जनसंख्या राज्यमन्त्री हिराचन्द्र केसीले स्वास्थ्य सेवा विभाग व्यवस्थापन महाशाखा अन्तरगतको आपूर्ति शाखा प्रमुख डा. सुरेन्द्र चौरसियासंग स्पष्टीकरण लिएका छन् ।

औषधि तथा उपकरण खरीदमा आर्थिक अनियमितता आरोप लागेका डा. चौरसियालाई राज्यमन्त्री केसीले मंगलबार अपरान्ह आफ्नै कार्यकक्षमा बोलाई स्पष्टीकरण लिएका हुन् ।

सो क्रममा उनले डा चौरसियालाई औषधि तथा उपकरण खरीदमा सेटिङ गर्ने मिलाउने र कमिसन खाने गरेको कुरा सञ्चारमाध्यमले उठाएको भन्दै त्यसको बास्तविकता के हो भन्दै सोधेका थिए ।

उनले औषधि उपकरण खरीद प्रकरणमा मनलाग्दी नगर्न निर्देशन समेत दिएका थिए ।

शाखा प्रमुख चौरसियाले भने राज्यमन्त्रीलाई आफूले कुनै गल्ती नगरेको बताएका थिए । ‘खै कता के के समाचार आएछ, त्यसपछि राज्यमन्त्री ज्यूले चासो व्यक्त गर्नु भएछ । मलाई चिठी काटेर बोलाएको भन्ने पनि मैले मिडियाबाट नै सुने । मेरो हातमा पत्र आईपुगेको थिएन । तै पनि म राज्यमन्त्री ज्यू कहाँ गएर सत्य तथ्य कुरा बताईदिए । जो आरोपको कुरा छ त्यसमा सत्यता छैन भने । मेरो कुरा सुनेपछि रुाज्यमन्त्री ज्यूले राम्ररी काम गर्नुहोला समेत भन्नुभयो । त्यसपछि मैले मन्त्री ज्यू, सचिव ज्यूहरुलाई पनि भेटेको हुँ, उहाँहरुले त यसबारेमा केही कुरा नै उठाउनु भएन पनि,’ चौरसियाले भने ।

यता राज्यमन्त्री केसीले भने सार्वजनिक भएका समाचार र डा चौरसियाले भनेका कुराका बारेमा सुक्ष्म अध्ययन भईरहेको बताए । उनले अध्ययन्ले गल्ती देखायो भने कानून बमोजिम कारवाही हुने बताए ।

यसअघि आज दिउसो राज्यमन्त्री केसीको सचिवालयले विभागले गरेको १० अर्बको औषधि उपकरण खरीदमा अनियमितता गरेको, ५० लाख रुपैयाँको लेनदेनम सरुवा गरेको, ५ करोड भन्दा बढी घुस लिएको लगायतका कुरा आएको भन्दै वास्तविकता के हो रु भनेर जवाफ माग गरेको थियो ।