एजेन्सी । विहीबार म्याक्सिकन एक जना नर्सलाई खोप लगाएर ल्याटिन अमेरिकामा कोरोना भाइरसविरुद्धको खोप अभियान शुभारम्भ गरिएको छ । म्याक्सिको सिटीमा रहेको रुविन लेनेरो अस्पतालमा कार्यरत ५९ बर्षीया नर्स मारिय इर्ने रामिरेजलाई पहिलो डोज खोप लिएर कोरोना विरुद्धको खोप अभियानको शुभारम्भ गरिएको हो ।

म्याक्सिकोले बुधबार मात्रै पहिलो लटमा युएस जर्मन कम्पनी फाइजर बायोन्टेकले उत्पादन गरेको ३ हजार डोज कोभिड विरुद्धको खोप प्राप्त गरेको थियो । त्यसो त उसले सो कम्पनीबाट ३ करोड ४० लाख डोज खोप खरीद गर्ने सम्झौँता गरिसकेको छ ।

मेक्सिकोका सरकारी अधिकारीहरुले सन् २०२१ को अप्रिलसम्ममा देशभरका सबै स्वास्थ्यकर्मीहरुले खोप पाइसक्ने दावी गरेको छ ।

म्याक्सिकोमा अहिलेसम्म १३ लाख ७२ हजार बढीमा कोरोना भाइरसको संक्रमण देखा परेको छ । त्यसमध्ये अहिलेसम्म १ लाख २१ हजारले सोही संक्रमणबाट ज्यान गुमाएका छन् ।

म्याक्सिको कोरोना भाइरसबाट सबैभन्दा बढी ज्यान गुमाउने देशहरुको सूचीमा अमेरिका, ब्राजिल र भारत पछि चौथो नम्बरमा छ ।

उता बिहीबार देखि नै  चिली र कोस्टारिकाले पनि फाइजर बायोन्टेकले बनाएको खोपको व्यवस्थापन गर्न शुरु गरेका छन् । ५ लाख ९५ हजार बढी संक्रमित रहेका चिलीमा साढे १६ हजार बढीले ज्यान गुमाएका छन् ।

यस्तै कुल १ लाख ६३ हजार बढी संक्रमित रहेको कोष्टारिकामा २ हजार १०० बढीले ज्यान गुमाएका छन् ।

अर्को ल्याटिन अमेरिकी देश अर्जेन्टिनाले पनि अर्को केही दिनपछि कोरोना बिरुद्धको खोप लगाउने योजना गर्दैछ । उसको रोजाईमा रसियाले उत्पादन गरेको स्पुतनिक भी खोप परेको छ । रसियाले विहीबार विहानै ३ लाख डोज स्पुतनिक भी खोप राजधानी व्युनर्समा पठाईसकेको छ ।

यता ब्राजिल कोरोनाबाट सबैभन्दा बढी मृत्यु हुने देशहरुको सूचीमा दोस्रो नम्बरमा छ तर फेब्रअरी मध्ये यता खोप कार्यक्रम शुरु हुन नसक्ने अधिकारीहरुले बताएका छन् ।

ब्राजिलियन राष्ट्रपति जैर बोल्सोनारोले खोप लगाउने योजना बनिनसकेको बताए । उनले ब्राजिलियनलाई हर्ड इम्युनिटीले काम गर्ने दावी गरेका छन् ।