नवलपरासी, ८ पुस । बर्दघाटस्थित चिसापानी अस्पतालले विशेषज्ञ सेवा शुरु गरेको छ । स्थानीय तहबाट सञ्चालित १५ बेडको उक्त अस्पतालमा गत सोमबारबाट हाडजोर्नी तथा नसारोग विशेषज्ञ सेवा शुरु गरेको हो ।

अस्पतालले निजी क्षेत्रबाट विशेषज्ञ चिकित्सक खोजी साप्ताहिक रुपमा सेवा शुरु गरेको हो ।  साप्ताहिक रुपमा बुटवलबाट हाडजोर्नी विशेषज्ञ डा समिर खान आएर सेवा दिएका छन् ।

‘अहिलेलाई हामीले साप्ताहिक रुपमा विशेषज्ञ सेवा सञ्चालन गर्न थालेका छौं । तर निकट भविस्यमै दैनिक रुपबाट यो सेवा उपलव्ध गराउने योजना छ,’ अस्पताल प्रशासक एवं जनस्वास्थ्य निरीक्षक रमेशचन्द्र न्यौपानेले  भने ।

त्यसो त अस्पतालले निकट भविस्यमै प्रसूति तथा स्त्री रोग, बाल रोग, पेट तथा छाती रोग, मुटु रोग सम्वन्धी विशेषज्ञ सेवा समेत सञ्चालन गर्ने योजना अघि सारेको छ । यस्तै छिटै नै रेडियोलोजी सेवा समेत सञ्चालन गर्ने भनेको छ ।

बर्दघाट नगरपालिका मातहतको यो अस्पतालको सेवा विस्तार गर्न मेयर धिरज शर्मा बस्यालको भूमिका महत्वपूर्ण रहेको न्यौपानेले बताए । मेयर बस्यालले अस्पतालको स्तरोन्नती गर्ने र स्थानीय तहमै विशेषज्ञ सेवा उपलव्ध गराई आम सर्वसाधारणलाई गुणस्तरीय स्वास्थ्य सेवा दिने आफूहरुको योजना अनुसार सेवा विस्तार गरिएको जानकारी दिए ।  उनले रुपन्देहीको देवदह मेडिकल कलेजसंग सम्झौँता गरी थप सेवा विस्तार गर्ने योजना रहेको समेत सुनाए ।

एक जना मेडिकल सुपरीटेन्डेन र दुई जना मेडिकल अधिकृत गरी तीन जना डाक्टरको दरबन्दी भएपनि अहिले सबै पद रिक्त छन् । तर अस्पताल व्यवस्थापनले तीन जना चिकित्सक करारमा लिएर सेवा निरन्तर दिएको छ ।

२४ घण्टा आकस्मिक सेवा, फार्मेसी सेवा र बर्थिङ सेन्टर सञ्चालन गरेको अस्पतालमा प्रयोगशाला तथा एक्सरे सेवा समेत सञ्चालनमा छ ।
पूर्वपश्चिम राजमार्ग छेवैमा रहेको अस्पतालमा सडक दुर्घटनाका केश बढी आउने गर्दछ ।

‘बढी सडक दुर्घटना हुने दाउन्ने क्षेत्र नजिकै छ । त्यसबाहेक राजमार्ग र भित्री बाटाहरुमा पनि धेरै दुर्घटना हुने गरेका छन् । त्यसैले पनि हामीले अहिले हाडजोर्नी तथा ट्रमा केशलाई हेर्ने गरी विशेषज्ञ सेवा सुरु गरेका हौँ,’ न्यौपानेले भने ।