काठमाडौँ, २४ मंसिर । सरकारले कोरोना संक्रमित कर्मचारीलाई कम्तीमा १४ दिन विदा दिने भएको छ । गत १० मंसिरमा बसेको मन्त्रिपरिषदको बैठकले सो निर्णय गरेको हो । सो सम्वन्धी निर्णय कार्यान्वयनका लागि अहिले प्रधानमन्त्री तथा मन्त्रिपरिषदको कार्यलयले आफ्ना मातहतका सबै निकायमा परिपत्र गरेको छ ।

नयाँ निर्णय अनुसार कोरोना पोजेटिभ देखिए पनि सामान्य अवस्थामा रहेको कर्मचारीलाई १४ दिनको बिदा, हस्पिटलमा बस्नुपर्ने अवस्थाको कर्मचारीलाई हस्पिटलमा उपचार गरेको समयावधिसम्म बिदा पाउने उल्लेख छ ।

साथै, निजी संघ संस्थाका हकमा समेत सोही अनुसारको व्यवस्था गर्नरगराउन पनि परिपत्रमा उल्लेख गरिएको छ । यो निर्णयसँगै यसअघि कोरोना संक्रमणका कारण कार्यालयमा आउन नसक्नेका कर्मचारीलाई पनि सोही अवधिको कोरोना बिदा पाउने भएका छन् । कोरोनाको कारण कार्यालयमा उपस्थित हुन नसकेका सरकारी तथा अर्धसरकारी निकाय सबैले उक्त बिदा पाउन सक्नेछन् ।

बिदाको लागि सम्बन्धित कार्यालय प्रमुखले क्वारेन्टिन वा आइसोलेशनमा बसेको वा अस्पतालमा भर्ना भएको व्यहोरासहितको प्रमाणहरु अनिवार्य छ । सार्वजनिक निकायमा कार्यरत पदाधिकारी वा कर्मचारी कोरोनाबाट संक्रमित भएमा वा कन्टयाक्ट ट्रेसिङ्गमा परेमा त्यस्ता पदाधिकारी वा कर्मचारीबाहेक अन्य कर्मचारी(पदाधिकारीबाट सार्वजनिक सेवालाई निरन्तरता दिने व्यवस्था मिलाउन समेत परिपत्रमा भनिएको छ ।

यसको नियमित अनुगमन सम्बन्धित मन्त्रालय र प्रदेश संकट व्यवस्थापन केन्द्र, जिल्ला कोभिड १९ संकट व्यवस्थापन केन्द्रले गर्नेछन् ।

हाल नेपालमा तीन तहमा एक लाख ३८ हजार निजामती कर्मचारीको दरबन्दी छ । संघमा ५९ हजार, प्रदेशमा २२ हजार पाँचसय र स्थानीयमा ६७ हजार कर्मचारीको दरबन्दी छ ।