काठमाडौँ, १ असार । ओम अस्पताल विरामी मृत्यु प्रक्ररणबाट नेपाल मेडिकल काउन्सिलले अस्पताल प्रशासनसंग स्पष्टीकरण लिने भएको छ ।

पित्तथैलीको पत्थरीको शल्यक्रिया गरिएकी ५० बर्षीया रामप्यारी थापा मगरको गत शुक्रबार मृत्यु भएको थियो । आफन्तहरुले थापाको मृत्युमा चिकित्सकको लापरवाही भएको बताउँदै आएका छन् ।

स्वास्थ्य सचिव रामप्रसाद थपलियाले ओम अस्पतालको घटनामा सम्वन्धमा पनि मन्त्रालयको ध्यानाकर्षण भएको बताए । ‘हामी कहाँ कुनै पक्षबाट पनि उजुरी आएको छैन । तर मिडियामा आयो हामीले हेर्यौँ । मेडिकल काउन्सिलको ध्यानाकर्षण गरायौँ । अब काउन्सिलले अस्पताल प्रशासनसंग स्पष्टीकरण सोध्नेछ । त्यसको जानकारी हामीलाई पनि गराउनेछ,’ उनले भने ।

काउन्सिलका प्रवक्ता डा दिलिप शर्माले रामप्यारी थापाको मृत्यु प्रकरणमा स्पष्टीकरण सोध्न लागिएको भन्दै त्यताबाट आउने जवाफको आधारमा थप कदम चालिने बताए ।

अघिल्लो शुक्रबार पित्तथैलीको शल्यक्रिया गर्न ओम अस्पतालमा ल्याइएकी थापाको शल्यक्रियाको क्रममा सानो आन्द्रामा प्वाल परेको र त्यसबाट लिक भएको फोहरले संक्रमण फैलिएर मृत्यु भएको बताइएको छ ।
आफन्तहरुले चिकित्सकको लापरवाहीको कारण विरामीको मृत्यु भएको बताउँदे आएका छन् ।

मन्त्रालयले आजै उपसचिव भानुभक्त न्यौपानेको संयोजकत्वमा गठित तीन सदस्यीय समितिलाई डडेल्धुरा अस्पतालको घटनाको छानवीन गर्न टोली पठाएको छ ।