काठमाडौँ, २१ चैत । सरकारले जिल्ला स्वास्थ्य /जनस्वास्थ्य कार्यालयहरुको संरचना तत्काल नहटाउने भएको छ । यद्धपी नाम भने परिवर्तन गर्ने तयारी गरेको छ ।

‘अव जिल्लाका स्वास्थ्य /जनस्वास्थ्य कार्यालयहरु प्रादेशिक फिल्ड कार्यालयको रुपमा सञ्चालित हुनेछन् । हामीले त्यहि अनुसारको कन्सेप्ट अघि बढाएका छौँ,’ स्वास्थ्य मन्त्रालयका नीति योजना महाशाखा प्रमुख एवं प्रवक्ता महेन्द्रप्रसाद श्रेष्ठले भने ।

यसअघि दुई तीन वटा जिल्ला गाभेर फिल्ड कार्यालय राख्ने तयारी भएको थियो । तर पछिल्लो पटक हरेक जिल्लाका स्वास्थ्य तथा जनस्वास्थ्य कार्यालयहरुलाई फिल्ड कार्यालयको रुपमा राख्ने तयारी भएको हो ।

‘स्वास्थ्य बढो संम्वेदनशील विषय हो । यो अरु मन्त्रालय र निकाय जस्तो होइन । यसैले यसलाई हटाउने कुरा हुँदैन । स्थानीय स्वायत्त शासन ऐन २०७४ ले पनि यसलाई हटाउन पर्ने भनेको छैन । त्यसैले यो रहन्छ,’ प्रवक्ता श्रेष्ठले भने ।

पूर्व सचिव र महानिर्देशकसंग छलफल गर्दै
यसैबीच स्वास्थ्यको संरचना कस्तो बनाउने ? जिल्ला स्वास्थ्य जनस्वास्थ्य कार्यालयलाई कसरी सम्वोधन गर्ने ? लगायतका विषयमा स्वास्थय मन्त्रालयले पूर्व सचिव र महानिर्देशकहरुसंग समेत राय सुझाव लिन लागेको छ ।

मन्त्रालयका प्रवक्ता श्रेष्ठ भन्छन्, ‘हामीले यसबारेमा छलफल गर्न भोली पूर्व सचिव ज्यूहरु, महानिर्देशक ज्यूहरुको भेला डाकेका छौँ । उहाँहरुको सल्लाह सुझाव के कस्तो आउँछ । त्यसले पनि स्वास्थ्यको नयाँ संरचना कस्तो बनाउने भन्नेमा सहजता हुन्छ ।’