काठमाडौँ, १९ मंसिर – स्वास्थ्य मन्त्रालयको छानवीन टोलीले एमबीबीएस प्रवेश परीक्षाको दुई पटक नतिजा निकाल्ने पाटन स्वास्थ्य विज्ञान प्रतिष्ठानको मेडिसिन विभागबाट विद्यार्थीको उत्तरपुस्तिका, नतिजा निकाल्ने सफ्टेर तथा कम्प्युटर जफत गरेको छ ।

मन्त्रालयका सहसचिव भोलाराम श्रेष्ठको नेतृत्वमा गएको चार जनाको टोलीले छानवीनका लागि भन्दै विभागबाट प्रवेश परीक्षा र नतिजाका लागि प्रयोग भएका सबै सामग्री जफत गरेको हो ।

गत १५ मंसिरमा प्रवेश परीक्षाको नतिजा प्रकाशित गरेको प्रतिष्ठानले कोडिङमा त्रुटी भएको भन्दै हिजो पुन अर्को नतिजा निकालेको थियो । नयाँ नतिजामा अघिल्लो पटक उत्तीर्ण भएका थुप्रै विद्यार्थी अनुर्तीण भएका छन् ।

नतिजा विवादमा परेपछि स्वास्थ्य मन्त्री गगन थापाले हिजो नै मन्त्रालयको तर्फबाट सहसचिव डा भोलाराम श्रेष्ठको उच्चस्तरीय समिति गठन गरि छानवीनका लागि निर्देशन दिएका थिए । सोही निर्देशन बमोजिम आज मन्त्रालयबाट डा श्रेष्ठको नेतृत्वमा खटिएको टोलीले सबै सामग्री जफत गरेको हो ।

टोलीका एक सदस्य शाखा अधिकृत कृष्णप्रसाद सुवेदीले १ हजार ९ सय बढी उत्तरपुस्तिका, सफ्टवेर सहिको ल्यापटम, कोडिङ सिट सहित सबै कागजात सिलबन्दी गरि मन्त्रालयमा ल्याएको बताए ।उनले काजजात र सफ्टवेरको अनुसन्धान संगै परीक्षामा सहभागी प्रतिष्ठानका अधिकारीकाहरु माथि समेत छानवीन सुरु गरिएको भएको बताए ।

‘किन यस्तो त्रुटी भएको भनेर सोधियो उहाँहरुले आफ्ना भनाई राख्नु भयो । हामीले अहिले सबै डकुमेन्ट र सामग्री सिल गरेर ल्याएका छौँ । सुवेदीले भने, केही दिनमा त्यसको प्रतिवेदन आँउछ । के भएको रहेछ भन्ने त्यसबेला नै थाह होला’ उनले भने ।

परीक्षाका अधिकारीहरुले अघिल्लो पटक परीक्षामा सहभागी नभएका १२ जनाको नतिजा उत्तीर्ण सूचीमा आएको समेत जानकारी दिएका थिए ।